سائق رقشه بودمدنى يقول
الاتوس غير مهدد لنا وناس الحركة والانضباط جننونا عديل
تاج الاصفياء عبد المنعم

اكتظت مدينة ودمدنى بالعديد من المركبات العامة وظلت وسيلة الترحيل إلى اى منطقة متوفرة لدرجة كبيرة جدا ورغم قرب المسافات بين الأحياء والمناطق الطرفية إلا أن السرعة أصبحت مطلوبة لمسابقة الزمن خاصة طلاب المدارس والعمال والموظفين بجانب أجدادنا وحبوباتنا وقد ظلت الرقشة بودمدنى مرغوبة للغلابة من المواطنين الكادحين بجانب سيارات الأمجاد ...... التقينا بأحد سائقي الرقشات ليتحدث عن همومه وما يعتريهم من معاناة

يقول احمد نور الدين وهو صاحب رقشه وسائق بها والله العظيم الواحد في ودمدنى دى بيعاني معاناة شديدة خلاص تمسكها من الطرق الرديئة والحفر والمطبات ..وتانى حاجة بقينا نعانى كمان من ناس الحركة محل ما تقبل تلقى واحد يحمر ليك الطريق ده ممنوع حددوا لينا طرق بعينها يعنى نلفلف اليوم كلو عشان نوصل لينا مشوار ما عارفين السر في كده شنو لو دايرين يقللوا الحركة من الشوارع كده ما يقللوها نحن بس الحيطة القصيرة عندهم ...كل يوم حملة لناس الرقشات وكمان بقينا الأيام دى مطاردين من ناس الانضباط قالوا عندهم رسوم كم وتلاتين جنيه بالاتفاق مع ناس نقابتنا الشيء المحيرنا انو ناس النقابة ديل بدل ما يقيفوا معانا واقفين ضدنا عديييييل قايتو ما عرفنا نلقاها من ناس الحركة ولا من ناس الانضباط ولا من ناس نقابتنا بقينا مجهجهين وكلهم جننونا والتوريدة قلت في الأيام دى وبعدين في حاجة تانية دايرين نوريها للناس انو الاتوس العاملين ليها قومه وقعده دى ما أثرت علينا والواحد أحسن ليهو يركب رقشه من الاتوس لأنها اقتصادية وما غالية وما فشخرة بالغالي نحن والله دايرين الوالي عبد الرحمن سر الختم ده يجتمع بينا ويستمع لينا نحن مظلومين ظلم الحسن والحسين ودا يرنو بس ربع ساعة وواثقين انو حايحل لينا موضوعنا ده لأنو والله لو ما خش في الموضوع ده ما في اى حل.