مشاهير وطرائف

آدم شية

حاوره بمدنى /تاج الاصفياء عبد المنعم
ببسمته الصافية واستقباله للزبائن ببشاشة وترحاب وملاطفته لهم علاوة على جودة ماكولاته اصبح ادم يوسف حسن الشهير بادم شية من رموز المشاهير بودمدنى وظل مطعمه قبلة لكثير من موظفى الدولة ورجال الاعمال وبعض العمال ورجال الشرطة وكافة شرائح المجتمع انضم ادم شية الى قائمة مشاهير اصحاب المطاعم بودمدنى ابوظريفة وكشك واخرون ..الاحداث وضعت ادم شية فى (الطوة )وعلى نار هادئة تحدث عن العديد من الجوانب المتعلقة بعمله
تحدث الينا ادم شية ولم يعطله هذا عن تلبية طلبات زبائنه والذين يزدادون فى ذروة عمله فى وجبة الافطار حيث رحب بنا ببسمته المعهودة وخرجنا منه بهذه الافادات.

انا اعتز جدا بلقب شيه واللقب ده اطلقوا على زبائنى والذين بدأوا معاىمسيرة اللحوم المشوية من فترة طويلة جدا وانا برتاح شديد لما ينادونى باللقب ده لانوبحس انو بربطنى بعملى وزبائنى وبعدين انا من مؤسسى السوق المركزى بمدنى ومن اوائل المحلات فى بداية التسعينات وتحديدا فى العام 1991.

مافى شريحة معينة بتجى لتناول اللحوم هنا شرائح كتيرة من مجتمع ودمدنى والقرى المجاورة بجونا هنا وبلقوا كل ما هو مطلوب من لحوم الضان المشوية وكمان بجونا الحريم الجنس اللطيف والحمد لله كل الزبائن بخرجوا مننا مبسوطين دى ما دعاية لمحلى لكن اسالوا براكم بتلقو الاجابة .

ايام الحمى النزفية فى مدنى كانت مسألتنا بايظة خلاص الناس الكان بجونا باستمرار وقفو وبطلو الجية وتاثرنا من الحمى النزفية وخوف الناس من اللحوم وحتى الناس الشوية الكان بجونا كانوا ياكلون فى خوف شديد ومن الطرائف فى الايام ديك جونا اثنين من الزبائن واحد منهم طلب (ام فتفت ) والثانى كان رافض شديد وقال اللحوم النية بتسبب النزفية ولكن صاحبنا الرفض ده بعد شوية غير رايو لانو شاف واحد اطباء مدنى المشهورين بياكل فى (ام فتفت) ذاتها وعلى طول قضوا عليها بشراهة شديدة شوف انا بجونى ناس من حتات كتيرة و المشاهير ورموز المجتع بجو هنا كتار ما بقدر احصرهم ليكم لكن من الفنانين شبارقة وهشام مرحوم وكان زمان عصام محمد نور وفنانين كتار ما بذكرهم برضو من اللاعبين محمد ادم وكرنقو لاعب الهلال لما يجى لاهلو هنا وهو زاتو قريبى وكمان ابوزر بخيت لاعب الاتحاد مدنى السابق ومن المدربين الديبة ومن رجال الاعمال والحرفيين اذكر منهم محمدين ومحمد عبده انا اخترت السوق المركزى عشان اسباب كتيرة اول حاجة لقربه من رئاسة مشروع الجزيرة لما كان المشروع زى الجنيه الدهب وكانوا الشغالين فيهو مرتاحين ما عندهم اى هم ولا بتتاخر مواههيم وما مشلهتين زى هسع وكمان برضو انا قلت انو ده ملتقى طرق شارع بركات وشارع سنار.

من المواقف التى لا انساها مرة جانى ضابط شرطة برتبة نقيب وكان فى قبالو عربجى طالب شية والنقيب طلب طلبو وبعدين قمت لبيت طلب العربجى والضابط واقف قام طوالى قال لى اسمع مفروض تدينى انا اول واتكلم عربى كتير قلت ليه يا جنابو لو ما العربجى ده انت ما كنت بقيت نقيب ..وبعد ما فات العربجى شكرنى عل كلامى ده .

مهنتنا دى انتشرت فى اسواق ودمدنى فيهم ناس شغالين يشوا اللحوم البتجى من الزبائن وناس شغالين زى ما انا شغال لكن بختلف عليهم كلهم بانو بشرف على ذبح الضان فى سلخانة بركات وبكشف بيطرى كمان وكمان بتعامل مع الزبائن بكل الاحترام وهنا فى السوق المركزى لايوجد غيرى فى ممارسة هذه المهنة .

انا رياضى وبحب الرياضة شديد وبشجع الكورة دى من زمان وبموت فى المريخ وبحب جمال الوالى رئيس نادى المريخ واقدم له الدعوة فى زياراته الى ودمدنى ليتناول وجبة الافطار من مشوياتنا وده يا استاذ ده ما معناه انو نحن ضد الهلال برضو بنشجعو لما يكون لاعب باسم السودان لدرجة اننا نبكى من الفرح لما يغلب برة وانا فى مدنى بشجع الرومان الاتحاد وبعتز بتشجيع هذا الفريق وبتمنى انو يكون دائما فى العلالى وبحترم فريق جزيرة الفيل وبقدر كمان ناس الاهلى سيد الاتيام وبتمنى كمان صعود النيل العريق للمتاز نادى النجوم وتبقى مدنى كفر ووتر زى زمان انا بحلم انو يكون عندى صالة كبيرة مكيفة عشان ما اقدم الدعوة لنجوم كتار ولضيوف المدينة من فنانين ومبدعين ورياضيين وبرضو بحلم انو ينصلح الحال فى مشروع الجزيرة ويرجع زى ماكان وتعود الحياة برضو لمصانع النسيج والزيوت وترجع تانى منطقة مارنجان عامرة بالعمال والموظفين والمهندسين.

الرجل ذو الذاكره الجباره

محمد عبد القادر أمين السني .... عرف عنه في مدينة ودمدني امتلاكه هبه من الله سبحانه وتعالي وهي امتلاك ذاكره خارقه في حفظ أرقام التلفونات والسيارات ومختلف أنواع الأرقام . يمكنكم تجربة ذلك بالاتصال به علي الرقم 00249912111599

سبحان الله